وزیر دفاع نے چری کوٹ سیکٹر پر اگلے مورچوںپرتعینات جوانوں سے ملاقات کی،مادر وطن کے دفاع کے لئے پاک فوج کے مورال کو سراہا

دفاع وطن کے لئے پوری قوم پاک فوج کے شانہ بشانہ کھڑی ہے، بھارتی فورسز کی جانب سے شہری آبادی پر گولہ باری قابل مذمت ہے،خرم دستگیر
مظفرآباد،اسلام آباد(نمائندہ جناح،وقائع نگار)وزیر دفاع انجینئر خرم دستگیر خان نے کہا ہے کہ ہمارے فوجیوں اور شہریوں کی شہادت نے قوم کے حوصلے کو مزید مضبوط بنادیا ہے، پاک فوج دشن کی جارحیت سے نمٹنے کے لئے ہمہ وقت تیار ہے۔ ترجمان وزارت دفاع کے مطابق وہ پیر کو آزاد کشمیر میں لا ئن آف کنٹرول کے دورہ کے دوران گفتگو کر رہے تھے۔ وزیردفاع خرم دستگیر خان نے کہا کہ اپنی خود مختاری کے دفاع کے لئے ہر قیمت ادا کرنے کے لئے تیار ہیں۔ انہوں نے کہا کہ پاکستان کشمیریوں کے حق خودارادیت کےلئے سیاسی، اخلاقی اور سفارتی حمایت جاری رکھے گا۔ وزیر دفاع نے ایل او سی کے چری کوٹ سیکٹر پر اگلے مورچوں کا دورہ کرکے جوانوں سے ملاقات کی۔ وزیر دفاع نے مادر وطن کے دفاع کے لئے پاک فوج کے مورال کو سراہا۔خرم دستگیر خان نے کہاکہ دفاع وطن کے لئے پوری قوم پاک فوج کے شانہ بشانہ کھڑی ہے۔ انہوں نے کہا کہ بھارتی فورسز کی جانب سے شہری آبادی پر گولہ باری قابل مذمت ہے، 2017ءمیں ایل او سی پر بھارتی اشتعال انگیزی کے تمام ریکارڈ ٹوٹ گئے۔کور کمانڈر راولپنڈی اور جی او سی نے وزیر دفاع کو ایل او سی کی تازہ ترین صورتحال سے متعلق آگاہ کیا۔