فاسٹ فوڈ بیماریاں پھیلانے میں اہم کردار ادا کر رہی ہیں،پبلک ہیلتھ سپیشلسٹ

فیصل آباد۔3 مارچ(اے پی پی )پبلک ہیلتھ سپیشلسٹ ڈاکٹر ذوالفقار علی نے بتا یا ہے کہ دنیا میں ہر سال 500ملین افراد ملیریا کے مرض میں مبتلا ہوتے ہیں جن میں غریب ترین لوگوں کی تعداد 70فیصد کے قریب ہے ۔اس طرح ترقی پذیر ممالک خصوصاً ایشیا کے ممالک کےلئے ملیریا ایک بڑھتا ہوا خطرہ ہے نیز ہر سال دنیا بھر میں ملیریا سے 10لاکھ افراد اور پاکستان میں 50 ہزار افراد کی ہلاکت بھی لمحہ فکریہ ہے۔ اے پی پی سے بات چیت کے دوران انہوں نے بتایا کہ دنیا میں ہر30 سیکنڈ کے بعد ایک بچہ ملیریا کے باعث لقمہ اجل بن جاتا ہے۔ انہوں نے بتایا کہ دنیا بھر کی طرح پاکستان میں بھی شوگر کے مریضوں کی تعداد میں اضافہ ہورہا ہے اور اس وقت شہری علاقوں کے 14 فیصد اور دیہی علاقوں کے 11 فیصد افراد شوگر میں مبتلا ہیں۔ انہوں نے کہا کہ فاسٹ فوڈ بیماریاں پھیلانے میں اہم کردار ادا کررہی ہیں۔ حالانکہ ہمارے بزرگ سادہ اور متوازن خوراک استعمال کرنے کے ساتھ ساتھ پیدل چلنے اور ورزش کرنے کے عادی تھے جس کے باعث ان پر بیماریوں کے اثرات نہ ہونے کے برابر تھے۔ انہوں نے کہا کہ اب بھی روزانہ 35 منٹ کی واک انسانوں کو بہت سی امراض سے بچا سکتی ہے۔