شریف خاندان کیخلاف ریفرنسز کی سماعت کرنیوالے جج کی ملازمت میں 3 سال کی توسیع

اسلام آباد: احتساب عدالت کے جج محمد بشیر کی مدت ملازمت میں 3 سال کی توسیع کردی گئی، فاضل جج شریف خاندان کے خلاف نیب ریفرنسز کی سماعت کر رہے ہیں۔

صدر مملکت ممنون حسین نے احتساب عدالت نمبر ایک کے جج محمد بشیر کی مدت ملازمت میں تین سال کی توسیع کی منظوری دے دی جس کے بعد وزارت قانون کی جانب سے باقاعدہ نوٹی فکیشن بھی جاری کردیا گیا۔

فاضل جج اب احتساب عدالت میں 12 مارچ 2012 تک فرائض انجام دیں گے، اس سے قبل وہ گزشتہ 6 سال سے اسی عدالت میں خدمات دے رہے ہیں۔

یاد رہے کہ احتساب عدالت کے جج محمد بشیر شریف خاندان کے خلاف نیب ریفرنسز کی سماعت کر رہے ہیں اور ان کی مدت ملازمت 12 مارچ کو ختم ہورہی تھی۔

جب کہ چیف جسٹس نے جج محمد بشیر کی مدت ملازمت میں توسیع نہ کرنے کا نوٹس لیا تھا اور گزشتہ روز سماعت کے دوران سیکرٹری قانون نے عدالت کو یقین دہانی کرائی تھی کہ فاضل جج کی مدت ملازمت میں توسیع کردی جائے گی۔

پاناما کیس کے فیصلے کی روشنی میں انہیں 6 ماہ کے اندر شریف خاندان کے خلاف نیب ریفرنسز کا ٹرائل مکمل کرنا ہے اور اس کی ڈیڈ لائن بھی 13 مارچ ہی ہے۔