شیری رحمان سینیٹ میں پہلی خاتون اپوزیشن لیڈر منتخب
اسلام آباد: پیپلزپارٹی کی رہنما شیری رحمان سینیٹ میں پہلی خاتون اپوزیشن لیڈر مقرر ہوگئیں۔
جیونیوز کے مطابق شیری رحمان ایوانِ بالا میں پہلی خاتون حزب اختلاف مقرر ہوگئی ہیں جس کا نوٹی فکیشن چیئرمین سینیٹ کی ہدایت پر سینیٹ سیکریٹریٹ نے جاری کردیا۔
شیری رحمان نے سینیٹ میں اپوزیشن لیڈر مقررہونے کے بعد اپنا دفتر بھی سنبھال لیا ہے۔
یاد رہے کہ شیری رحمان سے قبل پیپلزپارٹی کے ہی سینئر رہنما اعتزاز احسن سینیٹ میں اپوزیشن لیڈر تھے۔
پیپلزپارٹی کو اکثریت کی حمایت حاصل تھی: نیئر بخاری
دوسری جانب پیپلزپارٹی کے رہنما اور سابق چیئرمین سینیٹ نیئر بخاری نے شیری رحمان کی بطور اپوزیشن تقرری پر کہا ہےکہ پیپلز پارٹی کو اکثریتی ممبران کی حمایت حاصل تھی، شیری رحمان انتہائی قابل پارلیمنٹیرین ہیں، ان کی اپوزیشن لیڈر کے تقرر سے مثبت پیغام جائے گا۔
واضح رہے سینیٹ کے حالیہ انتخابات میں اپوزیشن اتحادکے صادق سنجرانی چیئرمین سینیٹ منتخب ہوئے جب کہ پیپلزپارٹی کے سلیم مانڈوی والا ڈپٹی چیئرمین سینیٹ کےعہدے پر فائز ہوئے۔
