شریف خاندان کے خلاف نیب ریفرنسز کی سماعت کچھ دیر میں ہوگی

اسلام آباد: سابق وزیراعظم نواز شریف، ان کی صاحبزادی مریم نواز اور داماد کیپٹن (ر) محمد صفدر کے خلاف اسلام آباد کی احتساب عدالت میں نیب ریفرنسز کی سماعت کچھ دیر میں ہوگی۔

نیب ریفرنسز کی سماعت احتساب عدالت کے جج محمد بشیر کریں گے۔

عدالت نے آج استغاثہ کے 2 گواہوں کو طلب کر رکھا ہے۔

سابق وزیراعظم آج 15 ویں، مریم نواز 17 ویں اور کیپٹین ریٹائرڈ صفدر 19 ویں بار پیش ہوں گے۔

کیس کا پس منظر

سپریم کورٹ کے پاناما کیس سے متعلق 28 جولائی 2017 کے فیصلے کی روشنی میں نیب نے شریف خاندان کے خلاف 3 ریفرنسز احتساب عدالت میں دائر کیے، جو ایون فیلڈ پراپرٹیز، العزیزیہ اسٹیل ملز اور فلیگ شپ انویسمنٹ سے متعلق تھے۔

نیب کی جانب سے ایون فیلڈ اپارٹمنٹس (لندن فلیٹس) ریفرنس میں سابق وزیراعظم نواز شریف ان کے بچوں حسن اور حسین نواز، بیٹی مریم نواز اور داماد کیپٹن ریٹائرڈ محمد صفدر کو ملزم ٹھہرایا گیا۔

دوسری جانب العزیزیہ اسٹیل ملز جدہ اور 15 آف شور کمپنیوں سے متعلق فلیگ شپ انویسٹمنٹ ریفرنس میں نواز شریف اور ان کے دونوں بیٹوں حسن اور حسین نواز کو ملزم نامزد کیا گیا ہے۔