وفاق اور چاروں صوبوں میں انتخابات جیت کر حکومت بنائیں گے، فاٹا میں توانائی منصوبے ،صنعتیں ،سکول ،کالجز ہسپتال بنائیںگے
سابق صدر کی پیپلزپارٹی میںشمولیت اختیارکرنےوالے انیس خان کی قیادت میںملنے والے وفدسے گفتگو،سینیٹررحمن ملک بھی ملے
اسلام آباد (خصوصی رپورٹر)سابق صدر اور پاکستان پیپلزپارٹی پارلیمنٹیرین کے صدر آصف علی زرداری نے کہا ہے کہ فاٹا کو خیبر پختونخوا کا حصہ بنانا پیپلزپارٹی کا مشن ہے پیپلزپارٹی مستقبل کا سوچتی ہے۔ چاہتے ہیں کہ وہاں بجلی پیدا ہو تاکہ وہاں صنعتیں لگیں لوگوں کو روزگار ملے۔جمعہ کے روز زرداری ہاوس میں مسلم لیگ ن با جوڑ کے رھنما نوابزادہ انیس خان کی قیادت میں ایک وفد نے آصف علی زرداری سے ملاقات کرکے پیپلزپارٹی میں شمولیت کا اعلان کیا اس موقع پر پیپلزپارٹی فاٹا کے صدر آخوند زادہ چٹان۔قمر زماں کائرہ۔ فیصل کریم کنڈی اور سینیٹر سردار علی خان بھی موجود تھے۔ آصف علی زرداری نے وفد سے خطاب کرتے ہوئے انہیں پیپلزپارٹی میں شمولیت پر مبارک باد دی۔ آصف علی زرداری نے کہا کہ انشاءاللہ وفاق اور چاروں صوبوں میں انتخابات جیتیں گے اور حکومت بنائیں گے فاٹا ہماری ترجیح ہے وہاں بجلی پیدا کریں گے۔صنعتیں لگائیں گے۔ سکول کالج یونیورسیٹی اور ہسپتال بنائیں گے تاکہ وہاں ترقی ہو روزگار کے مواقع میسر ہوں۔ اس موقع پر نوابزادہ انیس خان نے کہا کہ ہم غلط راستے پر تھے آج ہم درست راستے پر آئے ہیں۔دریں اثناءسابق صدر آصف علی زرداری سے سابق وزیرداخلہ سینیٹر رحمان ملک نے ملاقات کی جس میں آصف علی زرداری کو موجودہ سیاسی صورتحال اور ملک کی سیکورٹی صورتحال پر بریفنگ دی گئی۔ تفصیلات کے مطابق جمعہ کو یہاں اسلام آباد میں سابق صدر آصف علی زرداری سے اسلام آباد میںسابق وزیرداخلہ سینیٹر رحمان ملک نے ملاقات کی جس میں آصف علی زرداری کو موجودہ سیاسی صورتحال اور ملک کی سیکورٹی صورتحال پرپر بریفنگ دی گئی۔ملاقات میں ملک کی موجودہ صورتحال پر تفصیلی بات چیت ہوئی۔
