روز مرہ صفائی کی مصنوعات انسانی پھیپھڑوں کے لیے تباہ کن ہیں،طبی ماہرین

واشنگٹن ۔ 18 فروری (اے پی پی) امریکا کے طبی ماہرین نے کہا ہے کہ روز مرہ صفائی کے لیے استعمال ہونے والی مصنوعات کے انسانی پھیپھڑوں پر اثرات اتنے ہی تباہ کن ہیں جتنا کوئی شخص روزانہ 20 سگریٹ پیتا ہو۔عالمی ذرائع ابلاغ کے مطابق بیرگن یونیورسٹی کے پروفیسر سیسل سفانینس کی زیرنگرانی بیس سال تک کی جانے والی تحقیق کے مطابق خواتین خاص طورپر صفائی کرنے والی مصنوعات کے استعمال سے متاثر ہوتی ہیں۔ ان میں سانس کی خطرناک حد تک بیماریاں پھیل سکتی ہیں۔ ماہرین نے تحقیق کے دوران 6235 مرد و خواتین کا طویل عرصے تک تجزیہ کیا،ماہرین نے زور دیا ہے کہ صفائی کے لیے استعمال ہونے والی مصنوعات کو زیادہ عرصے تک زیراستعمال نہ رکھیں بلکہ انہیں تبدیل کرتے رہیں۔انھوں نے بتایا کہ جو خواتین گھروں میں صفائی کی مصنوعات کو مسلسل 10 سے20 سال کے لیے استعمال کرتی ہیں ان کے پھیپھڑوں کو اتنا ہی نقصان پہنچتا ہے جتنا کہ یومیہ بیس سیگریٹ پینے والے شخص کو پہنچتا ہے۔