سہ ملکی سیریز :آسٹریلیا نے نیوزی لینڈ کو ہرا کر سہ ملکی سیریز جیت لی

آکلینڈ : آسٹریلیا نے نیوزی لینڈ کو شکست دے کر سہ ملکی ٹی ٹونٹی انٹرنیشنل کرکٹ سیریز جیت لی ، بارش کے باعث آسٹریلیا نے نیوزی لینڈ کو ڈک ورتھ لوئس میتھڈ کے تحت 19 رنز سے شکست دی۔
کینگروز نے 151 رنز کے ہدف کے تعاقب میں 14.4 اوورز میں 3 وکٹوں پر 121 رنز بنائے تھے کہ بارش شروع ہو گئی، طویل انتظار کے بعد جب بارش نہ تھمی تو امپائرز نے دونوں ٹیموں کے کپتانوں کی مشاورت سے میچ ختم کرنے کا اعلان کیا، ایشٹن ایگر میچ اور گلین میکسویل سیریز کے بہترین کھلاڑی قرار پائے ۔

گزشتہ روز آکلینڈ میں کھیلے گئے فائنل میں نیوزی لینڈ کے قائد کین ولیمسن نے ٹاس جیت کر پہلے بیٹنگ کا فیصلہ کیا جو ان کیلئے درست ثابت نہ ہو سکا، کیویز نے پہلے کھیلتے ہوئے مقررہ اوورز میں 9 وکٹوں کے نقصان پر 150 رنز کا مجموعہ ترتیب دیا، مارٹن گپٹل اور کولن منرو نے ٹیم کو 48 رنز کا آغاز فراہم کیا، سٹین لیک نے گپٹل کو آؤٹ کر کے ٹیم کو پہلی کامیابی دلائی، گپٹل 21 رنز بنا کر آؤٹ ہوئے ، اگلے اوور میں رچرڈسن نے منرو کو آؤٹ کر کے ٹیم کو بڑی کامیابی دلائی، منرو 29 رنز بنا سکے۔

دونوں اوپنرز کے آؤٹ ہونے کے بعد کیویز بلے باز بڑا مجموعہ ترتیب نہ دے سکے، روز ٹیلر 43 رنز بنا کر ناٹ آؤٹ رہے ۔ ایشٹن ایگر نے 3 رچرڈسن اور اینڈریو ٹائی نے 2، 2 سٹین لیک اور سٹوئنس نے ایک، ایک وکٹ لی۔ جواب میں بارش کی وجہ سے آسٹریلوی ٹیم 19 رنز سے کامیاب قرار پائی، ڈی آرسی شارٹ اور وارنر نے شاندار بلے بازی کا مظاہرہ کرتے ہوئے ٹیم کو 72 رنز کا جاندار آغاز فراہم کیا۔

آرسی شارٹ 50 رنز مکمل کرنے کے بعد منرو کی گیند کا نشانہ بنے ، 78 کے سکور پر ڈیوڈ وارنر 25 رنز بنا کر بولڈ ہوئے ، ایشٹن ایگر کا بلا نہ چلا اور صرف 2 رنز بنا کر سینٹنر کی گیند پر سٹمپ ہوئے ، اس موقع پر میکسویل اور فنچ نے مل کر سکور 121 تک پہنچایا تھا کہ دوبارہ بارش شروع ہو گئی جس کی وجہ سے میچ مکمل نہ ہو سکا اور آسٹریلوی ٹیم ڈک ورتھ لوئس میتھڈ کے تحت 19 رنز سے فاتح رہی۔