پی ایس ایل: کوئٹہ گلیڈی ایٹرز کی لاہور قلندرز کے خلاف یک طرفہ فتح
شین واٹسن اور اسد شفیق کی بیٹنگ اور محمد نواز کی شاندار بولنگ کے باعث کوئٹہ گلیڈی ایٹرز نے لاہور قلندرز کو باآسانی 9 وکٹوں سے شکست دے دی۔
دبئی کے انٹرنیشنل کرکٹ اسٹیڈیم میں کھیلے جا رہے میچ میں لاہور قلندرز کی جانب سے دیئے گئے ہدف کے تعاقب میں کوئٹہ گلیڈی ایٹرز کے اوپنرز کی جانب سے عمدہ کھیل کا مظاہرہ کیا گیا۔
شین واٹسن اور اسد شفیق کے دوران 92 رنز کی شراکت قائم ہوئی جس کے بعد آسٹریلوی آل راؤنڈر سنیل نارائن کی گیند پر آؤٹ ہوگئے۔
قبل ازیں لاہور قلندرز کی جانب سے اننگز کا آغاز برینڈن مکلم اور سنیل نارائن نے کیا اور دونوں نے ابتداء سے ہی جارحانہ انداز اپنایا۔
لاہور قلندرز کو پہلا نقصان چوتھے اوور میں ہوا جب سنیل نارائن 10 گیندوں پر 28 رنز بنا کر راحت علی کی گیند پر انور علی کے ہاتھوں کیچ آؤٹ ہوئے۔
دوسرے آؤٹ ہونے والے کھلاڑی فخر زمان تھے جو ایک رن بنا کر جوفرا آرچر کی گیند پر ان ہی کے ہاتھوں کیچ آؤٹ ہوئے۔
لاہور قلندرز کو تیسرا نقصان بھی 60 کے مجموعی اسکور پر اس وقت ہوا جب برینڈن مکلم 30 رنز بنا کر محمد نواز کی گیند پر ایل بی ڈبلیو آؤٹ ہوئے۔
کیمرون ڈیلپورٹ بھی دو چھکوں کی مدد 8 گیندوں پر 15 رنز بنا کر محمد نواز کی گیند پر انور علی کے ہاتھوں کیچ آؤٹ ہوئے۔
اگلے ہی اوور میں حسان خان نے عمر اکمل کو ایک رن پر ایل بی ڈبلیو کر دیا۔
رضا حسن اور گلریز صدف بھی اسکور میں خاطر خواہ اضافہ نہ کرسکے اور بالترتیب 4 اور 13 رنز بناکر پویلین لوٹ گئے۔
لیگ اسپنر یاسر شاہ (2) نے شین واٹسن کی گیند گراؤنڈ سے باہر پھینکنے کی کوشش کی تاہم صرف وکٹ کیپر سرفراز احمد کو کیچ دے پائے۔
اختتامی بلے باز بھی اسکور میں کوئی خاص اضافہ نہ کرپائے اور لاہور قلندرز اپنے مقررہ اوورز میں صرف 119 رنز ہی بناسکی۔
کوئٹہ کی جانب سے محمد نواز نے اپنے چار اوورز میں محض چار رنز ہی دیے اور دو وکٹیں بھی حاصل کیں۔ اپنے اسپیل کے دوران انہوں نے 20 ڈاٹ بالز کروائیں۔
اس کے علاوہ جوفرا آرچر نے بھی 23 رنز کے عوض تین وکٹیں حاصل کیں۔
قبل ازیں کوئٹہ گلیڈی ایٹرز کے کپتان سرفراز احمد نے ٹاس جیت کر لاہور قلندرز کو پہلے بیٹنگ کی دعوت دی۔
دونوں ٹیمیوں ٹورنامنٹ میں اپنا پہلا پہلا میچ ہار چکی ہیں۔
کوئٹہ گلیڈی ایٹرز کو اپنے پہلے میچ میں کراچی کنگز کے ہاتھوں شکست کا سامنا کرنا پڑا تھا جب کہ لاہور قلندرز کو ملتان سلطانز نے شکست دی تھی۔
