سپریم کورٹ: عائشہ گلالئی کی نااہلی کیلئے عمران خان کی اپیل مسترد

اسلام آباد: سپریم کورٹ نے عائشہ گلالئی کی نااہلی سے متعلق عمران خان کی درخواست خارج کردی۔

چیف جسٹس پاکستان کی سربراہی میں عائشہ گلالئی کی نااہلی سے متعلق عمران خان کی درخواست کی سماعت ہوئی تو عمران خان کے وکیل نے اپنے دلائل میں کہا کہ عائشہ گلالئی نے ایک پریس کانفرنس میں کہا پارٹی چھوڑ رہی ہوں، انہوں نے وزیراعظم کےانتخابات میں ووٹ نہ دےکرپارٹی ڈسپلن کی خلاف ورزی کی۔

جسٹس اعجاز الاحسن نے عمران خان کے وکیل سے استفسار کیا کہ کہ کیا پارٹی چیئرمین نے وزیراعظم کے انتخاب میں خود ووٹ دیا تھا؟ وکیل نے بتایا کہ نہیں عمران خان شہر میں نہیں تھے۔

چیف جسٹس نے عمران خان کے وکیل سے استفسار کیا کہ اگرعائشہ گلالئی بھی یہ ہی کہیں کہ وہ شہر میں نہیں تھی تو؟

جسٹس ثاقب نثار نے سوال کیا کہ کیا عائشہ گلالئی کی طرف سے تحریری استعفیٰ آیا؟ کیا انہوں نے استعفیٰ دے دیاہے؟ عمران خان کے وکیل نے نفی میں جواب دیا۔

عدالت عظمیٰ نے سماعت مکمل ہونے کے بعد چیئرمین تحریک انصاف کی درخواست کو مسترد کردیا۔

عائشہ گلالئی کی میڈیا سے گفتگو

عدالتی فیصلے کے بعد میڈیا سےگفتگو کرتے ہوئے عائشہ گلالئی نے کہا کہ پاکستان کی تینوں بڑی جماعتوں کے سربراہ چور ہیں، جو بھی ان کے  ٹکٹ لے گا ان پر بھی جوتوں کی بارش ہوگی۔

انہوں نے کہا کہ یہ لوگ قوم کا پیسہ لوٹ کر ایک شخص کا دفاع کرتے ہیں، یہ سب سرمایہ دار ہیں۔

واضح رہےکہ تحریک انصاف کی منحرف رکن عائشہ گلائی نے عمران خان پر خواتین سے متعلق الزامات عائد کیے تھے اور اپنی الگ جماعت بنانے کا بھی اعلان کیا تھا۔