دلیر مہدی کی 2 سال کی سزا معطل
ممبئی: پٹیالہ کی عدالت نے انسانی اسمگلنگ کیس میں معروف بھارتی گلوکار دلیر مہدی کی 2 سال قید کی سزا معطل کردی۔
بھارتی ریاست پنجاب کے شہر پٹیالہ کی عدالت میں ایڈیشنل اینڈ سیشن جج راجیو کرلا نے انسانی اسمگلنگ کیس میں پٹیالہ ہی کے ایک جج کی جانب سے معروف بھارتی گلوکار دلیر مہدی کو دی گئی 2 سال کی سزا معطل کردی۔
اس سے قبل 16 مارچ کو پٹیالہ کے ایک جج نے گلوکار دلیر مہندی اور ان کے بھائی کو انسانی اسمگلنگ کے الزام میں 2 سال قید کی سزاسنائی تھی جس کے بعد دلیر مہندی اور ان کے بھائی شمشیر سنگھ کو حراست میں لے لیا گیا تھا بعد ازاں گلوکار کی جانب سے عبوری ضمانت کی درخواست دی گئی۔
دلی کی ایک عدالت نے گلوکار دلیر مہدی کی قبل از گرفتاری ضمانت کی درخواست کو مسترد کرتے ہوئے کہا تھا کہ لوگوں کو غیر قانونی طور پر بیرون ملک بھجوانے کے معاملے میں ان کی زیر حراست تفتیش ضروری ہے۔ بعد ازاں دلی ہائی کورٹ نے گلوکار کی 2 نومبر تک 10 روزہ ضمانت منظور کرلی تھی لیکن اس دوران انہیں ملک سے باہر جانے کے لیے عدالت سے اجازت لینا ضروری قرار دیا تھا۔
واضح رہے دلیر مہندی اور ان کے بھائی شمشیر سنگھ پر 1998 اور 1999 میں 10 لوگوں کے دو گروپس کو بھاری رقم کے عوض غیر قانونی طور پر امریکا بھجوانے کا الزام تھا۔ 2003 میں بخشش سنگھ نامی شخص نے دونوں بھائیوں کے خلاف دھوکا دہی کا الزام لگا کر ایف آئی آر درج کرائی تھی۔
